Handbolti

Utan vallar: Dúkurinn spyr ekki um aldur

Tómas Þór Þórðarson í München skrifar
Gísli Þorgeir Kristjánsson stígur sín fyrstu skref á stóra sviðinu í dag.
Gísli Þorgeir Kristjánsson stígur sín fyrstu skref á stóra sviðinu í dag. vísir/tom

Það hefur tæplega farið fram hjá nokkrum manni að Ísland er mætt með ungt lið til leiks á HM. Mjög ungt á handboltamælikvarða. Meðalaldurinn er aðeins 24 ár en þetta er fjórða stórmótið í röð sem að meðalaldurinn lækkar. Kynslóðaskiptin eru komin.

Þegar að íslenska landsliðið hefur leik á móti Króatíu í dag verður leikstjórnandinn, heili liðsins, væntanlega Selfyssingurinn Elvar Örn Jónsson, 21 árs á sínum fyrsta stórmóti, hægri skyttan Ómar Ingi Magnússon, 21 árs á sínu öðru stórmóti, og línumaðurinn Arnar Freyr Arnarsson, 22 ára á sínu þriðja stórmóti.

Til taks á bekknum og í hópnum eru svo línumaðurinn Ýmir Örn Gíslason, 21 árs á sínu fyrsta stórmóti, Gísli Þorgeir Kristjánsson, 19 ára á sínu fyrsta stórmóti og Haukur Þrastarson, 17 ára á sínu fyrsta stórmóti. Ungir og efnilegir menn á uppleið.

Hinn 21 árs gamli Elvar Örn Jónsson byrjar líklega sem leikstjórnandi. Hann spilar í Olís-deildinni. vísir/tom

Ekki spurt um aldur

Hægt er að fabúlera fram og aftur um hversu ungt liðið er, hversu reynslulausir sumir leikmannanna eru á stóra sviðinu og hvaða möguleg og ómöguleg áhrif aldurinn getur haft á spilamennsku liðsins. Eru nýliðarnir ungu ekki tilbúnir? Verður HM í Þýskalandi of stórt fyrir þá? Verða tæknifeilarnir of margir? Hver veit?

Eftir leik er svo hægt að velta þessu öllu aftur upp nema þá er hægt að greina hlutina betur og sjá hvort að einhverjum af þessum spurningum verður svarað. En, á meðan leikurinn er í gangi eru allir jafngamlir. Það eru bara allir handboltamenn.

Gólfdúkurinn sem liðin spila á og markstangirnar spyrja nefnilega ekkert um aldur. Sautján ára nýliði getur verið jafnmikil stjarna í leik og 37 ára reynslubolti sem gæti allt eins verið faðir þess unga. Það er það fallega við íþróttir.

Guðmundur Guðmundsson valdi ungt lið sem hefur leik í dag. vísir/tom

Engin miskunn

Sama hvað þú ert gamall, ef búið er að velja þig í íslenska landsliðið í handbolta er nú kominn tími til að standa sig. Umræðunni er lokið. Fyrsti leikur er í dag og stuðningsmenn verða ekkert í stúkunni ef illa fer.: "Æ, hann hefði skorað úr þessu dauðafæri ef hann væri orðinn 25 ára."

Það er oft sagt að við Íslendingar séum góðu vön með handboltann okkar. Eins og það sé eitthvað slæmt. Af hverju ættum við ekki að vera góðu vön og gera kröfur? Þrátt fyrir smæð landsins er Ísland mætt á 36. stórmótið sitt í sögunni. Gengið hefur misvel en við ætlumst til árangurs og við megum það alveg.

Árangur þarf ekkert alltaf að þýða að spila um verðlaun og það verður ekki kveikt í íslenska fánanum fyrir utan Ólympíuhöllina ef leikurinn gegn Króatíu tapast  í dag. Alls ekki. Við viljum bara sjá liðið fara upp á við eftir hörmungina í janúar í fyrra.

Guðmundur treystir þessum ungu strákum til að hjálpa til við að rétta skútuna og ef þér er treyst fyrir því að spila í bláu treyjunni þá er enginn miskunn lengur. Þú ert einn af 16 bestu handboltamönnum landsins, betri en ansi margir og þá þarftu að standa undir því hvort sem að þú heitir Elvar Örn eða Björgvin Páll.

Haukur Þrastarson er til taks sem 17. maður en hann er einmitt 17 ára. vísir/tom

Spennandi kynslóð

Björgvin Páll Gústavsson kallaði þessa nýju kynslóð drengja svampa, proffa og handboltanörda í viðtali í gær. Hann sagði þá yfirgengilega metnaðarfulla íþróttamenn sem drykkju allan fróðleik í sig, hugsa svakalega vel um sig og eru spólgraðir í að sýna sig.

Í gegnum handboltaþáttinn minn hef ég fylgst ansi náið með þessum nýjustu landsliðsmönnum eins og Selfosstríóinu Elvari Erni, Teiti Erni og Hauki sem og Valsmanninum Ými sem allir eru í Olís-deildinni nema Teitur sem fór í atvinnumennsku síðasta vor.

Það er rétt hjá Björgvin iað það er eitthvað aðeins öðruvísi við þessa drengi. Þeir hafa fengið mikið að spila með meistaraflokki frá því þeir voru börn og eru komnir með slatta af leikjum. Þeir eru vel þjálfaðir, metnaðarfullir og bara ógeðslega góðir.

Ég skal viðurkenna að sjálfur er ég fáránlega spenntur fyrir því að sjá hvort þeir kynna sig inn með stæl og ég hef fulla trú á þeim og íslenska liðinu. Það virðist eitthvað jákvætt í farvatninu og þar til annað kemur í ljós er fínt að fljóta áfram með þeirri öldu.

Talið svo aftur við mig eftir leik.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.