Fótbolti

Að­stoðar­þjálfarinn skoraði gegn Ragnari og dönsku meisturunum

Anton Ingi Leifsson skrifar
Létt yfir Ragga og félögum fyrir leikinn í dag.
Létt yfir Ragga og félögum fyrir leikinn í dag. vísir/getty

Ragnar Sigurðsson spilaði síðari hálfleikinn í dag er dönsku meistararnir í FCK gerðu 2-2 jafntefli við OB í æfingaleik í Danmörku. Aðstoðarþjálfari OB gerði jöfnunarmarkið.

Dönsku liðin byrjuðu að æfa í síðustu viku og eru byrjuð að spila æfingaleiki til þess að undirbúa sig undir byrjun deildarinnar en danska úrvalsdeildin fer aftur að rúlla um næstu helgi.

Ragnar Sigurðsson byrjaði á bekknum en kom inn á í hálfleik er staðan var 2-0 fyrir FCK þar sem þeir Mohamed Daramy og Pep Biel höfðu skorað fyrir Kaupmannahafnarliðið í fyrri hálfleik.

OB minnkaði muninn í síðari hálfleik með marki Moses Opondo eftir vandræðagang í vörn FCK og fjórum mínútum fyrir leikslok jafnaði Henrik Hansen. Hansen er ekki leikmaður OB heldur aðstoðarþjálfari en vegna þunnskipaðs leikmannahóps þurfti hann að koma inn á.

Hann þakkaði þjálfarateyminu traustið og jafnaði metin í 2-2 eftir laglega vippu eftir að Kalle Johnsson, markvörður FCK, hafði nánast gefið boltann á hann. Lokatölur 2-2 en eins og áður segir byrjar danski boltinn um næstu helgi.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.