Ferðalög

Perlur Íslands: Seitlandi töfraorka og stórkostleg upplifun

Sylvía Rut Sigfúsdóttir skrifar
Álfrún Pálsdóttir á Vestfjörðum.
Álfrún Pálsdóttir á Vestfjörðum. Mynd/Úr einkasafni

„Ef það er einhver einn staður á Íslandi sem veitir mér einstaka orku þá eru það Vestfirðirnir. Maður finnur töfraorkuna seitlast að manni um leið og keyrt er niður Steingrímsfjarðarheiðina inn í Djúpið þar sem allir ævintýralegu firðirnir taka á móti manni umkringdir háum tindum. Vestfirðirnir eru hreinlega alveg magnaður staður,“ segir Álfrún Pálsdóttir kynningarstjóri Hönnunarmiðstöðvar. Hún er nú á fullu að undirbúa hátíðina HönnunarMars, sem haldin er í júní í ár vegna aðstæðna. 

Vinkonurnar Álfrún Pálsdóttir og Aldís Pálsdóttir ljósmyndari.Mynd/Úr einkasafni

„Ég er ættuð frá Vestfjörðum í gegnum móðurfjölskylduna og við stórfjölskyldan erum vön að fara alltaf einu sinni á ári í gönguferðir um Vestfirði undir leiðsögn afa sem þekkir hverja þúfu fyrir vestan. Stundum höfum við gist í botni Önundarfjarðar, að Holti, sem býður upp á bleikar strandir og skemmtilega bryggju til stökkva í sjóinn eftir langar göngur upp á fjöll og á heiðar milli fjarða. Svo er auðvitað skylda að skella sér í sjóinn að gönguferð lokinni.“

Mynd/Úr einkasafni

Gönguferð með fjölskyldunni á svæðinu er minning sem er Álfrúnu mjög kær. 

„Það er mjög minnistætt sumarið sem við gengum á fjallið Gölt, sem er beint á móti Suðureyri við Súgandafjörð, tókum bát frá Suðureyri yfir fjörðinn og fórum upp á topp í 18 stiga hita, sól og logni - og útsýni yfir Vestfirðina sem skörtuðu sínu fegursta. Það var stórkostleg upplifun sem er greipt í minninguna.“

Systurnar á toppi GöltsMynd/Úr einkasafni
Þriggja ára og þreyttur í 10 tíma fjallgöngu hálfa leið að KaldbakMynd/Úr einkasafni
Mynd/Úr einkasafni

„Við Önundarfjörð eru svo auðvitað fallega Flateyri, stutt í bæði Ísafjörð og Suðureyri og sniðugt að taka hinn hringinn á leiðinni heim og kíkja til dæmis á Dynjanda.“

Fjölskyldumynd við DynjandaMynd/Úr einkasafni

„Vestfirðir eru því efstir á lista yfir áfangastaði sumarsins í mínum bókum, þetta sumarið og næstu.“

Perlur leynast víða á Íslandi og það er ljóst að sumarið 2020 verða Íslendingar á ferð og flugi um alla landshluta. Vísir verður á flakki með landanum í sumar. Veist þú um perlu sem landsmenn ættu ekki að missa af á ferðalagi? Segðu okkur frá og sendu okkur myndir á netfangið ritstjorn@visir.is. Við birtum valdar frásagnir hér á Vísi.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.